Er fólk (og Jóhanna) að missa vitið???

Nákvæmlega hvaða aðgerðir stranda á því að Davíð sitji tveimur dögum lengur í seðlabankanum? Vantar ríkisstjórnina reiðufé sem að Davíð vill ekki láta þau fá eða hvað? Auðvitað þarf að koma Davíð frá en kommon það er vonandi ekki það eina sem er á dagskrá ríkisstjórnarinnar. Ríkisstjórnin þarf að hætta þessu rugli og koma sér að verki. Ef að meirihluti viðskiptanefndar telur að bíða þurfi í 2 daga eftir skýrslu til þess að frumvarpið verði betra þá tel ég að það sé hennar réttur. Nógu er búið að kvarta yfir því að Alþingi sé afgreiðslustofnun, hvar eru þær raddir nú?

Framsókn skekur ríkisstjórnina

Ætli þetta sé ástæðan fyrir ESB söng Samfylkingarinnar???

Gæti það verið að Samfylkingarþingmenn hugsi sér gott til glóðarinnar að komast í fínu partíin í Brussel á þessum líka fínu launum. Það virðist allavega vera meira atriði að komast þar inn en að tryggja hagstæða samninga fyrir Íslendinga.

Hátt launaðir Evrópuþingmenn

Kemur það á óvart???

Ekki stærsta frétt ársins að Geir ætli ekki að fara fram. Hinsvegar hlýtur það að vera áhyggjuefni fyrir flokkinn hvað fáir frambærilegir kandídatar eru á þessum lista. Einna helst líst mér á gamla skólabróður minn Þórlind Kjartansson sem stóð sig ágætlega á sínum tíma sem inspector scholae. Ég hef grun um að lítli endurnýjun muni eiga sér stað á listanum þar sem að kostnaður við að koma sér á framfæri mun verða mikill og ekkert hefur heyrst af sameiginlegum kynningum ss. fundum eða blaðaútgáfu. Þetta mun trúlega gera það að verkum að gömlu þekktu jálkarnir munu hafa betur.

Geir gefur ekki kost á sér

Sanngjarn sigur

Stjörnumenn voru einfaldlega betri í dag. KR-ingar byrjuðu betur en eftir það datt fátt ofaní og þeirra helsta von var að Teitur myndi sprengja Stjörnuliðið á því að rótera einungis á 6 mönnum lungann úr leiknum. Það var hinsvegar fyrst og fremst frábær vörn sem skóp þennan sigur. Fannar, Guðjón og Jovan áttu hreinlega teiginn og vörðu fjölmörg skot auk þess að hirða flest fráköst sem til féllu sérstaklega í fyrri hálfleik. Jón Arnór var sá eini sem að þorði að keyra á körfuna á meðan hinir reyndu þriggja stiga skot. 35 þriggja stiga tilraunir en einungis 11 körfur segja allt sem segja þarf um hvernig það gekk. Nú er síðan spurningin um hvort að KR-ingar ná að gyrða sig í brók og koma inn í úrslitakeppnina á fullu gasi. 

Teitur: „Vissi að við gætum höndlað pressuna“

Illskiljanlegt

Hvernig er hægt að misnota skattaskjól. Fyrir mér er það eins og að barnaníðingur sé misnotaður. Mér er nánast alveg sama. Væntanlega er fréttamaðurinn að vísa til þess að ekki sé verið að nota skattaskjólin til síns venjulega ólöglega tilgangs þeas. svíkja undan skatti. Þess í stað er verið að nota þau sem miðstöð peningaþvættis. Þetta hlýtur að vera áfall fyrir eigendur skattaskjóla að þau séu notuð í þessum tilgangi. Þetta eru svoddan englar eftir allt saman.

Skattaskjólin misnotuð

Menn sem stunda óheiðarleg viðskipti á að lögsækja af fullum þunga

Það skiptir ekki máli hvaða aðilar eiga í hlut. Þetta mein sem ólöglegt samráð, uppskrúfað eigið fé og önnur svik á að skera burt. Beita þarf hörðustu refsingum sem lög leyfa til að setja fordæmi sem tekið er eftir. Vettlingatökin sem við sáum í olíusamráðinu þegar forstjórarnir sluppu við að bera ábyrgð á sínum glæpum eru forkastanleg og hafa líklegast helgast af tengslum eins forstjórans við sjálfstæðisflokkinn. Brot á samkeppnislögum þar sem að brotaviljinn er jafn einbeittur og í olímálinu og að því er virðist í þessu máli á að jafngilda innbroti eða þjófnaði að refsingu. Hér er um sama hlutinn að ræða og þrátt fyrir að brotamennirnir séu í fínum jakkafötum og keyri um á fínum bílum þá á að gilda það sama um þá og Lalla Johns. Glæpur er glæpur!

Leynifundir með Samkeppniseftirlitinu

Aðskilnaður Haga og Baugs er riftanlegur

Telji skiptastjóri/tilsjónarmenn að kröfueigendur fái meira upp í sínar kröfur með því að afturkalla flutning Haga undir Gaum þá hefur hann fullan rétt til þess. Þessar vangaveltur benda til að þetta sé í fullri umræðu.

Sölu Haga hugsanlega rift

Hvar eru gögnin?

Er Friðbert með einhver gögn til að styðja þessar fullyrðingar? Ég reikna ekki með því að gjaldkerar hafi verið á ofurlaunum en hinsvegar fékk maður á tilfinninguna að flestir aðrir væru mun betur launaðir en aðrir í sambærilegum störfum.

Sjáum hvað setur

Þangað leitar klárinn þar sem að hann er kvaldastur

Það er eitt sem að ég skil ekki við nýlega uppsveiflu Sjálfstæðisflokksins í könnunum. Getur það virkilega verið að fólk sé farið að treysta Sjálfstæðisflokknum, flokknum sem byggði síðustu kosningabaráttu á því að honum einum væri treystandi fyrir efnahagsstjórninni, til þess að taka við stjórnartaumunum á ný? Ég hreinlega trúi því ekki upp á fólk að það sé svo gleymið að það muni ekki eftir því að Sjálfstæðisflokkurinn ber 95% pólitíska ábyrgð á efnahagshruninu. Slíkt væri nýtt Íslandsmet í skammtímaminni.

Það sem ég hygg að sé að koma sjálfstæðismönnnum til góða er að þeir hafa gripið til aðgerða sem reynst hafa þeim vel í gegnum tíðina. Upphrópanir um að kommúnistar og anarkistar séu að taka völdin og spil þeirra á óttan um að ástandið geti orðið enn verra ef að þeir halda ekki um stjórnvölinn. Málið er bara að ástandið getur ekki orðið verra. Sjálfstæðisflokkurinn er búinn að sýna það svart á hvítu að tilvera hans snýst eingöngu um að verja og styrkja stöðu auðvaldsins á Íslandi. Gömul innantóm slagorð eins og stétt með stétt eru í hrópandi ósamræmi við það sem flokkurinn hefur afrekað. Gríðarlegt bil á milli þeirra hæst og lægst launuðu sem síðasta sumar birtist í þeirri mynd að launalægsti hópurinn gat ekki einu sinni látið sig dreyma um að eignast húsnæði eða bifreið. Hann átti varla málungi matar því að fjölskylda með tvær fyrirvinnur á lágmarkslaunum hafði um 200 - 250 þúsund í ráðstöfunartekjur af hverju þurfti að greiða 150 þúsund í húsaleigu. Það þarf engan snilling til að sjá að 50-100 þúsund er ekki mikið til að greiða af fæði og klæði ásamt öðru. Þetta kerfi hefur sjálfstæðisflokkurinn markvisst byggt upp á síðustu árum og því miður tók Framsóknarflokkurinn þátt í vitleysunni um tíma. Framsóknarflokkurinn stóð að vísu fastan vörð um heilbrigðiskerfið og Íbúðalánasjóð en misréttið á launamarkaðnum fékk að aukast jafnt og þétt jafnframt því að þjónustugjöld og jaðarskattar sem jafnan koma harðast niður á þeim launalágu jukust. Þessa stefnu hefur Framsókn nú kvatt ásamt stefnu Halldórs Ásgrímssonar. Samvinna og félagshyggja verða að vera kjörorð flokksins ásamt manngildi ofar auðgildi.

En aftur að sjálfstæðisflokknum. Gamall maður í minni sveit sagði mér eitt sinn að sumir væru svo auðsveipir undir auðvaldið að þrátt fyrir að það brenndi ofan af því húsið og misþyrmdi börnum þeirra þá ætti auðvaldið atkvæði þeirra vís. Með því að vísa til lægstu hvata mannskepnunnar, óttans, virðist vera sem að sjálfstæðisflokknum sé að takast að reisa sín Potemkin tjöld yfir fortíðina til að komast aftur að kjötkötlunum með það markmið eitt að 5 prósent Íslendinga hafi það betra en hin 95 prósentin.

Styðjum Hlina

Ég skora á Framsóknarmenn í SV kjördæmi að styðja Hlina í annað sæti listans. Hlini hefur flest það til brunns að bera sem stjórnmálamenn framtíðarinnar þurfa til að bera. Hann er einlægur og fylgir sinni sannfæringu sem er að allir eigi jöfn tækifæri og að samvinna og jöfnuður eigi að vera kjörorð hins nýja Íslands.

Hlini óskar eftir 2. sæti í SV