Útstrikanagleði í Reykjavík suður

Mikið hefur verið rætt um útstrikanir í Reykjavík suður og þá helst í tengslum við Björn Bjarnason. Það sem vekur hinsvegar athygli mína er það hve fáar útstrikanir Jónína Bjartmarz fékk. 50 útstrikanir eða 2,36% af atkvæðum Framsóknar höfðu útstrikanir með nafni Jónínu. Eftir darraðardans undanfarinna vikna átti maður von á öllu meira af slíku. 

Í þessu samhengi er rétt að benda á að Kolbrún Halldórsdóttir var strikuð út á 3,56% atkvæða VG. Ekki sat hún nú undir neinum árásum eins og Björn og Jónína. Greinilegt að sumir þurfa lítið að hafa fyrir því að afla sér óvinsælda. 

Rúmlega 2500 strikuðu yfir nafn Björns

Er Geir að draga seiminn á vinstri flokkunum?

Það er ekki laust við að manni finnist svolítil líkindi með stöðu mála nú og stöðunni árið 1995. Munurinn er þó sá að ef Sjálfstæðismenn ætla að slíta stjórninni eins og þá þá kemur það varla að ráðherrum Framsóknar að óvörum. Það læðist að mér sá grunur að Jón og Geir séu að láta vinstri flokkana engjast aðeins til að Sjálfstæðisflokkurinn eigi auðveldara með að semja við þá með afarkostum. Ekki síst eftir að möguleikanum á vinstri stjórn var sópað út af borðinu með tilboði VG um minnihlutastjórn. Ég hafði nú vonað að VG menn væru ekki alveg svona veruleikafirrtir eins og er að koma á daginn. Með þessu hafa þeir fleygt eina trompi vinstri flokkana fyrir borð því nú getur Sjálfstæðisflokkurinn deilt og drottnað að vild.

Ef Geir var með flest trompin á hendi á sunnudagsmorguninn þá hefur staða hans bara batnað við hina ótaktísku spilamennsku VG.

Varnarsigur hjá Samfylkingu og Framsókn?

Það var skondið að sjá viðbrögð ISG við kosningatölunum þar sem talað var fjálglega um varnarsigur  og  að  Jafnaðarmannaflokkur Íslands  væri enn við  góða  heilsu.  4,2% í tap  og 2 þingmenn  fyrir borð  er tap  hvernig  sem  á það er  litið. Ekki reyndi Jón Sigurðsson að lýsa sig sigurvegara kosningabaráttunnar þrátt fyrir að Framsókn hefði bætt við sig 4-5% á síðustu sex vikunum sem er hlutfallslega svipuð aukning og Samfylkingin fékk ef ekki meiri.

Það er alveg ljóst að nú þarf að láta undan síga , endurskipuleggja liðið og blása síðan til gagnsóknar. Að mínu mati er það fráleitt að halda áfram núverandi stjórnarsamstarfi eins og sakir standa. Mitt mat er að annaðhvort mynda Samfylking og Sjálfstæðisflokkur stjórn eða að mynduð verði vinstri stjórn með þátttöku Framsóknarflokksins. Sterkast fyrir Framsóknarmenn sem flokk væri stjórn S&D því eftir síðasta stjórnarsamstarf þeirra flokka fékk flokkurinn eina af sínum betri kosningum eða rúmlega 23%.

Eðlilegast væri í stöðunni að Framsóknarmenn héldu sig til hlés í stjórnarmyndunarviðræðum og kæmu einungis inní þær þegar allir aðrir kostir væru reyndir til þrautar. Flokkurinn mun að sjálfsögðu ekki bregðast þingræðislegum skyldum sínum að stuðla að myndun starfhæfrar ríkisstjórnar en fyrst held ég að eigi að leyfa öðrum að spreyta sig. 

Annars eru þetta mest spennandi kosningar síðan ég fór að fylgjast með af alvöru og alltaf eitthvað nýtt að gerast, stjórnin inni og úti og þar fram eftir götunum. Tímamismunurinn gerði það þó að verkum að ég lognaðist útaf um hálffimmleytið í nótt (2:30 GMT) með ríkisstjórnina inni og Framsókn með 7 þingmenn og Siv úti. Það voru því gleðitíðindi þegar konan vakti mig í morgun með það að Sammi frændi væri kominn inn og Siv orðin kjördæmakjörin og töldum við hjónin okkur að sjálfsögðu eiga hlut í því með utankjörstaðaratkvæðunum okkar. Það voru því síðan eilítil vonbrigði þegar Ragnheiður hirti af Samma sætið í síðustu tölum með 11 atkvæðum. 8 hefði litið betur út en 7 svona á pappírnum amk.    

Öskur á sporbaug!

Eitthvað virðist beyging orða vera að vefjast fyrir fréttaritara mbl. að þessu sinni. Nema ef það hafi verið upptaka af öskrum 200 manna sem sendar hafi verið í geimferð. Hefði ekki verið réttara að segja Ösku 200 manna sem skotið ... ? Annars er vonandi að askan finnist svo að menn komist í jörð. Ég hafði annars alltaf skilið þetta þannig að askan yrði á sporbaug að eilífu. Ætli það sé svosem á geimruslið bætandi þegar maður fer að hugsa þetta aðeins lengra. 

Scotty týndur eftir geimferð

Kannanir og fylgisflakk

Var að horfa á fréttir Stöðvar 2 áðan og sá "nýju" könnunina þeirra. Mér finnst það ótrúlega slakt hjá opinberri stofnun eins og Félagsvísindastofnun að láta taka sig í svona vinnubrögðum. Fyrst er valið úrtak uppá 2400 manns og náð í 64% þeirra á fimm daga tímabili. Vönduð vinnubrögð og eflaust sæmilega hægt að marka fylgið en kannski erfitt að spá í þróunina þegar notað er svona langt tímabil skömmu fyrir kjördag þegar fólk er óðum að gera upp hug sinn. 

Könnunin var hinsvegar svolítið flopp þegar hún kom síðan út í gærkvöldi, rétt á hæla könnunar frá Gallup þar sem Framsókn hafði tekið mikið stökk uppá við milli daga. Þetta stökk var afar lítið í könnun Félagsvísindastofnunar og því lyktaði könnunin svolítið af því að vera orðin úrelt fyrir birtingu. Auðvitað er það súrt í broti að vinna mikla og góða könnun þegar hún er síðan úrelt en viðbrögð Félagsvísindastofnunar eru auðvitað kolröng. Í stað þess að einbeita sér að því að vinna könnun morgundagsins betur er rokið í að bæta við úrtakið 300 manns og klippa fyrstu þrjá dagana af könnuninni í tilraun til að uppfæra könnunina. Það vita það nú flestir sem eitthvað hafa haft með tölfræði að gera að ef eitthvað á að vera að marka niðurstöðuna þá þýðir ekki að rugla í úrtaksmenginu eða breyta um aðferðafræði eftir að könnunin er hafin. Ef rétt er farið með þá er úrtakið 1700 manns af hverjum 300 eru frá í dag væntanlega en hinir 1200 frá mánudegi og þriðjudegi. 

Auðvitað þýðir þetta ekki endilega að það sé miklu meira að marka Gallup kannanirnar en þeir hafa þó allavega aðferðafræði sem þeir halda sig fast við og ætti því að gefa áreiðanlegri niðurstöður.

Gallup mælir Framsókn um helgina í 7,6% með 950 manna úrtaki og 62% svarhlutfalli, þar sem 80,9% nefndu flokk. Sunnudag til mánudags mælist fylgi Framsóknar 9,8% í 1150 manna úrtaki og 63,7% svarhlutfalli, þar af nefndu 86% flokk. Mánudag til þriðjudag mælist fylgið 14,6% í 1048 manna úrtaki og 64,1% svarhlutfall, þar af nefndu 86,6% flokk. Þriðjudag til miðvikudag mælist síðan fylgið 13,6% í 1097 manna úrtaki með 64,2% svarhlutfalli og þar af nefndu 89,5% flokk. 

Af þessu má ljóst vera að um leið og óákveðnum fækkaði þá jókst fylgi Framsóknar og reyndar líka Samfylkingarinnar. Sveiflan er því ekkert óeðlileg að því leyti. Það er löngu vitað að kjósendur Sjálfstæðisflokksins og VG eru flokkshollir og gefa óhikað upp afstöðu sína á meðan miðjuflokkarnir ná fyrst sínu fylgi skömmu fyrir kosningar. Fylgi D og V minnkar ekki tölulega séð í könnununum heldur hlutfallslega þegar fleiri taka afstöðu.

Nú verður mikill kannanadagur á morgun og nóg að spá og spekúlera í og allt virðist vera opið ennþá. Það verður spennandi að sjá hvort að mínir menn skríða upp fyrir 15% á morgun og ef ekki þá, þá amk. á laugardag, þegar loksins kemur könnun sem ekki þarf að véfengja eða spá í úrtökum.

Árangur áfram og ekkert stopp 

Samfylking og Framsóknarflokkur bæta við sig samkvæmt könnun Stöðvar 2

Kraftaverkin gerast enn

Þessu hefði maður ekki trúað fyrir tveimur mánuðum síðan að Framsóknarmenn væru að nálgast kjörfylgi og komnir upp fyrir VG. Minnir að munurinn hafi verið nærri 22% á milli flokkanna. Óákveðnum fer fækkandi og því ætti að vera eitthvað að marka þetta en maður veit jú aldrei. Enginn hefur komist á þing í gegnum skoðanakönnun. Eitthvað virðist fólk vera farið að sjá í gegnum eineltið sem Framsókn hefur þurft að þola að undanförnu og búið að átta sig á að þarna fer flokkur sem hefur hagsmuni lands og þjóðar í öndvegi. Nú er bara að spýta í lófana og ná 20% markinu. Allt er hægt með svona byr í seglunum.

Fylgi Framsóknarflokksins tekur stökk

Hvert fór rauði liturinn hjá VG?

Ja maður spyr sig. Núna á lokasprettinum virðast menn vera að reyna að segja skilið við fortíðina. Er verið að færa fókusinn frá hinum vinnandi stéttum yfir til umhverfisins? Spurning hvað nýja litgreiningin skilar mönnum úr kössunum á laugardag.

Alcoa vs. Alcan

Það verður spennandi að fylgjast með framrás þessa máls. Alcan hefur verið mun betur rekið síðustu árin og er óðum að nálgast Alcan í umsvifum þrátt fyrir að hafa þurft að selja frá sér hluta fullvinnslu sinar í Evrópu (Novelis). Ef þessi samruni gengi í gegn held ég að samkeppnisyfirvöld myndu víða fara á stjá því sameinað fyrirtæki myndi vera allsráðandi á álmarkaðnum og þá sérstaklega á markaði fyrir fullunnið ál. Á því sviði væri Norsk Hydro nánast eini keppinauturinn á meðan Rio Tinto/BHP Billiton og Rusal væru einungis stórir leikmenn á umbræðslumarkaðnum.

Talið að yfirtökutilboð Alcoa í Alcan muni mæta andstöðu

Campeones Campeones Ole Ole Ole

Ekki er nú venja hjá manni að gleðjast yfir því að Arsenal nái í stig en það var gleðiefni að þessu sinni. Fínt að geta farið inn í síðustu tvo áhyggjulausir. Þetta er náttúrulega snilldarafrek hjá Fergussonum að vinna titilinn þegar tekið er tillit til þess hversu djúp pyngja Stafnfurðubryggjumanna er. Nú er bara að klára bikarinn og sýna Chelski hverjir eru bestir.

Manchester United enskur meistari 2007

Telja auglýsingar Framtíðarlandsins með hjá Gallup?

Nú þegar Gallup heldur mikið og ,,vandað" bókhald yfir auglýsingakostnað stjórnmálaflokkana til að koma í veg fyrir ofeyðslu þá fara að birtast auglýsingar frá samtökum sem sjá sér hag í að reyna að hafa áhrif á kjósendur með auglýsingum. Þarna er auðvitað átt við Framtíðarlandið sem birtir auglýsingar í Fréttablaðinu í dag. Mun Gallup telja þessa dálksentimetra með í kostnaði S,V og I listanna? Ef ekki þá er þess væntanlega skammt að bíða að sjá langar sjónvarpsauglýsingar frá Mjólkursamsölunni með Guðna Ágústssyni drekkandi mjólk. Eða Geir og Þorgerði í auglýsingu frá Samtökum atvinnulífsins. Svona tiltæki gerir samkomulag flokkanna á milli marklaust með öllu og er spurning hvort að flokkarnir munu hafa það að engu eftir þessa uppákomu.