Sól í andstreymi

Eitthvað virðist vera að draga af Sólarmönnum í andstöðu sinni sérstaklega eftir fundaröð Hafnarfjarðarbæjar þar sem flestum þeirra áherslupunktum var vísað til föðurhúsanna. Á fundunum var staðfest að tekjur Hafnarfjarðarbæjar verða 800 miljónir á ári en ekki 100 eins og Sólarmenn hafa ranglega haldið fram. Einnig kom það fram að það er nóg framboð af atvinnulóðum þannig að ávinningsútreikningur Hagfræðistofnunar er ekki réttur að því leyti að það þurfi að velja annaðhvort álver eða aðra atvinnustarfsemi heldur er hægt að velja bæði og fá því mun meiri ábata fyrir Hafnarfjörð. Á fundunum var líka sýnt klárlega fram á að loft eða hljóðmengun af álverinu verður áfram langt undir öllum mörkum og mun ekki aukast í hlutfalli við stækkun álversins. Það verður því engin rýrnun á loftgæðum í Hafnarfirði af völdum stækkunar. Hvað sjónmengun varðar þá verður ekki stórbreyting á að öðru leyti en því að nýjar raflínur verða lagðar að álverinu. Þær verða í svipuðum stíl og þær núverandi en í mun meiri fjarlægð frá íbúabyggðinni. 

Í skýrslu Hagfræðistofnunar er bent á að sjálfar framkvæmdirnar gætu á þenslutímum ýtt undir þensluna vegna innflutnings á búnaði til verksmiðjunnar. Hér held ég að það ætti að skoða skilyrðið fyrir þessari fullyrðingu. Ef ekki eru þenslutímar þá ýtir stækkunin ss. ekki undir þenslu. Nú bendir flest til þess að hagkerfið sé að kólna og þenslan að minnka og því ekki þenslutímar. Álframleiðsla fer að hefjast á Reyðarfirði sem mun laga viðskiptahallann nokkuð auk þess sem innflutningur til framkvæmda fyrir Austan er nær lokið. Með minnkandi þenslu mun atvinnuleysi væntanlega aukast á ný og munu því eflaust vera starfsmenn fyrir stækkunina á lausu 2010-11 þegar stækkunin tekur til starfa.

Einhverjir hafa spáð í því afhverju Alcan greiðir ekki fasteignagjöld í Hafnarfirði í dag. Ástæðan fyrir því er einföld, Alcan hefur frá upphafi greitt svokallað framleiðslugjald sem hefur skipst milli Ríkis og Hafnarfjarðarbæjar og ekki önnur gjöld.  

 

Það er því ljóst að Sólarmenn eru að verða uppiskroppa með rök gegn stækkuninni og bíðum við því spennt eftir hverju þeir halda fram næst. 

Hvað myndi gerast ef þeir réðust inní Íran??

Spurningin hvort að 7 riddaraliðssveitin yrði að skipta þyrlunum út fyrir hesta? Hef grun um að Íranir eigi slatta af Stinger loftvarnaflaugum þannig að það yrði ekkert gaman að þyrlast um fjöllin í Íran. Black Hawk down þrisvar á dag amk.

Það er hinsvegar ótrúlegt að svokallaður besti og tæknivæddasti her í heimi eigi ekki tæki og búnað til að heyja stríð lengur en í 15 mínútur í einu. Hvað hefðu greyin gert ef til 3 heimsstyrjaldar hefði komið gegn Rússum? Hefðu þeir beðið um framleiðslupásu til að eiga flugvélar þyrlur og skriðdreka eftir fyrstu vikuna?? 

Bandaríkjaher hefur misst 130 herþyrlur í Írak og Afganistan

Þó fjandakornið fyrr hefði verið

Afsakið orðbragðið en mér hefði fundist tímabært að gera þetta fyrir lifandis löngu. Það kemur þá kanski á daginn hvort að bankarnir hafa rétt fyrir sér þegar þeir segjast nánast ekkert græða á Íslendingum, þetta sé allt útrásinni að þakka. 

Hmmmmmm. Ég bíð spenntur eftir niðurstöðunni. 

Samanburður á kostnaði og þjónustugjöldum banka og sparisjóða

Aðeins 300.000 eftir

Eitthvað gengur undirskriftasöfnunin hægar en maður hefði haldið. Ef við segjum að 200.000 séu kosningabærir og þar með lögráða þá ættu samkvæmt því 50.000 að vera VG menn og 44.000 Samfó. Að aðeins rúmlega 5000 af þessu fólki séu búin að skrifa undir er því frekar skrýtið. Eru 90% stuðningsmanna VG og Samfylkingarinnar að yfirgefa umhverfisstefnuna á síðustu metrunum? Eða eru þeir bara ekki nettengdir?

Undirskriftir nálgast sjötta þúsundið

Ögrun á ögrun ofan

Ahmadinejad veit svosem fyrir víst að hann myndi sigra ef Bandaríkjamenn réðust inn í Íran. Hann hefur því ekkert að óttast. Ef fólk heldur að Írak sé erfitt mál þá ætti það að ímynda sér tvöfalt fjölmennari þjóð í þrefalt stærra ríki fullu af fjöllum. Síðan megum við ekki gleyma því að Íranir eru mun trúaðri en Írakar þannig að það verður enginn vandi fyrir Ahamadinejad að lýsa yfir heilögu stríði. Þetta verður líkt og Afghanistan bara á stærri skala.

Er ekki gáfulegra að koma á samningaviðræðum og leysa þetta þannig heldur en að vera endalaust að skrölta með sveðjunum. Mér finnst samningatækni Bush stjórnarinnar orðin ansi einhæf uppá það síðasta. 

Áhyggjulaus Íransforseti

Ef ég væri forseti Írans og væri að dúlla mér við að byggja kjarnorkuver myndi ég vera vel vakandi. Goggi W aka. the unhinged loon in the White house á eftir að vera nærri tvö ár í starfi enn. Hver veit nema honum fari að leiðast á næsta ári og skelli sér í eitt svona smástríð í viðbót. Munar varla mikið um það eftir allt sem á undan er gengið.

Ahmadinejad hefur ekki áhyggjur af því að Bandaríkin geri árás á Íran

Frábær árangur

Aðra keppnina í röð ná MR-ingar að skora nærri 40 stigunum sem er afrek. Nú er bara að fylgja þessu eftir og hirða hljóðnemann og setja hann á sinn stað á nýjan leik.

Glæsilegt drengir og til hamingju 

MR í úrslit Gettu betur

Dr. Jekyll og Mr. Hyde - Samfylkingin í hnotskurn

Á þessum síðustu og verstu tímum í stuttri sögu Samfylkingarinnar er ástandið innan flokksins farið að líkjast ástandinu í Rómaveldi á 5 öld. Hver höndin er upp á móti annari í því fáti sem komið hefur á flokkinn eftir að skoðanakannanir sýndu að flokkurinn stefndi hraðbyri niður fyrir 20% markið og yrði þar með litli bróðir VG. Sem dæmi um þetta er afstaða flokksins í málefnum álversins í Straumsvík. Samfylkingin sem er við völd í  Hafnarfirði hefur staðið að málinu á skynsmalegann hátt að mínu mati með því að leyfa bæjarbúum að segja sína skoðun á málinu. Það má síðan deila um hvernig þeir hafa staðið að kosningunum og hvort að það sé eðlilegt að meirihluti leggi fram skipulagstillögu án þess að mæla með henni. Látum það liggja á milli hluta.

Á  meðan þessu hefur farið fram í Hafnarfirði hefur ýmislegt gengið á í Samfylkingunni á landsvísu. Ingibjörg Sólrún kom upphaflega fram og hrósaði Samfylkingunni í Hafnarfirði fyrir að ganga á undan með íbúalýðræði og taldi þetta innarbæjarmál Hafnarfjarðar. Ekki löngu síðar þegar skoðanakannanirnar fóru að gefa til kynna fylgisflótta til vinstri sáu ISG og fylgisveinar hennar sér þann kost vænstan að skipta um skoðun á málinu. Skyndilega var kosningin í Hafnarfirði orðin marklaust plagg því Ingibjörg og Samfylkingin myndi beita sér fyrir því að áverið yrði ekki stækkað með öllum tiltækum ráðum. Samfylkingin í Hafnarfirði er semsagt að leggja málið í dóm íbúanna í óþökk móðurflokksins. Samfylkingin ætlar greinilega að láta þetta heita dýra skoðanakönnun sem er þá væntanlega þarflaus með öllu. 

Síðan undra Samfylkingarmenn sig á að fylgið hverfi

Ja ég bara spyr 

Hver ætlar að leysa vanda Vestfjarða?

Gísli Tryggvason kom með athugasemd hjá mér í dag varðandi hvaða lausnir Framtíðarlandið og flokkarnir sem því tengjast S og VG hafa hugsað upp fyrir byggðavandann á Vestfjörðum. Mér varð fátt um svör enda viðkvæði VG að fólk eigi að gera eitthvað annað og hjá Framtíðarlandinu er mönnum að ég held sama um Vestfirði svo lengi sem Vestfirðingar séu ekki að fara að virkja, leggja vegi eða neitt í þá áttina. Hjá Samfylkingunni kom Guðmundur Steingrímsson með það útspil um daginn að hægt væri að ,,hvetja" landsbyggðarfólk til að sækja um þau störf sem losnuðu hjá ríkinu sem hægt væri að vinna í fjarvinnslu. Dofri Hermannsson lapti þetta upp eftir nafna en málið er að þetta er ekki ný hugmynd og fyrri tilraunir hafa oft endað með ósköpum. Grundvöllurinn fyrir starfsemi af þessu tagi er háhraða internettenging sem í dag fyrirfinnst ekki allstaðar á Vestfjörðum til að mynda. Þess utan verður að nefna það að á þessum umhverfisverndartímum þá myndi slík fjarvinnsla kalla á ótaldar ferðir til höfuðstaðarins til funda og annars með tilheyrandi mengun.

Hér er þörf bæði víðtækari og róttækari aðgerða. Til að byrja á byrjuninni þarf að gera Vestfirðingum kleift að stunda nám sitt ef ekki í heimahögunum þá amk. nærri þeim. Á Ísafirði starfar framhaldsskóli en í öðrum byggðarlögum er aðeins um grunnskóla að ræða. Reynt hefur verið að koma á háskólanámi í gegnum fjarfundabúnað á Ísafirði og er það að sjálfsögðu af hinu góða. Reynslan hefur sýnt og ég get persónulega vottað þar um að það er ekki auðvelt að fara að heiman til náms (ég var 14 ára) og snúa síðan heim aftur að loknu námi sem á takmarkað erindi við heimabyggðina. það sem ég held að fólk hugsi heldur ekki alveg til enda er að á mennta eða háskólaárunum nær fólk sér oft í maka og þegar þetta nám fer fram fjarri heimahögunum eru jú minni líkur á að þar tengist fólk sé með sama viðhorf til átthaganna fyrir Vestan. Það að flytja til Vestfjarða á nýjan leik hef ég prófað sjálfur um eins árs skeið og var ég þó í þeirri aðstöðu að konan mín var af sama svæði. Ekki entumst við hjónakornin lengi í sveitasælunni og fluttum aftur á mölina með skottið á milli lappanna. Takmörkuð þjónusta og fábreytt atvinnulíf vóg þyngra á metunum en þeir kostir sem óneitanlega eru við að búa í fámennu samfélagi með sinni samheldni og afslöppuðu andrúmslofti. Ég tel amk. að lykillinn að því að þeir sem taka þá ákvörðun að flytjast til Vestfjarða haldi áfram að búa þar sé að bæta þjónustu, atvinnulíf og samgöngur.

Hvað varðar þjónustu þá er nauðsynlegt að koma upp fleiri sýndarframhaldsskólum á Vestfjörðum. Patreksfjörður, Hólmavík og Reykhólar gætu til að mynda verið starfsstöðvar þar sem starfa myndi umsjónarmaður en nánast öll kennsla færi fram í gegnum fjarfundabúnað. Efling háskólakennslu á Ísafirði með sama hætti og á hinum þrem fyrrnefndu stöðum yrði fólki gert kleift að stunda háskólanám samhliða því á Ísafirði sé áhugi fyrir hendi. Ýmiskonar endurmenntun gæti síðan farið fram á kvöldin fyrir íbúa á svæðinu til að nýta búnaðinn sem best.

Atvinnulífið hefur átt undir högg að sækja svo að ekki sé meira sagt. Kvótaflutningar og gjaldþrot hafa fækkað hinum hefðbundnu störfum við sjósókn og ekki stendur landbúnaðurinn tryggum fótum. Til að snúa þessari þróun við þarf róttækar aðgerðir. Mér dettur helst í hug skattaívilnanir til einstaklinga og fyrirtækja. Þetta mynd þjóna tvennum tilgangi, annarsvegar að gera þeim auðveldara fyrir sem nú þegar stunda atvinnu sína á Vestfjörðum og hinsvegar að lokka til Vestfjarða fyrirtæki eða einstaklinga með góðar viðskiptahugmyndir. Hvað sjávarútvegsmálin varðar myndi ég telja að útvíkkun á byggðakvótahugtakinu þar sem ákveðinn kvóti yrði eyrnamerktur Vestfjörðum en gæti hinsvegar verið framseljanlegur milli báta eða byggðarlaga, þó einungis innan Vestfjarða eða á minni svæðum innan Vestfjarða gæti verið hluti af lausninni. Þessar aðgerðir myndu styrkja sjávarútveginn og vonandi efla atvinnulífið samfara því. Síðan er spurningin hvort hægt sé að byggja upp minni iðnað á svæðinu og jafnvel orkufrekann iðnað í smáum stíl. Vestfirðingar eiga um 300 Gwh af orku í Hvalá í Ófeigsfirði sem hægt væri að nýta ef tækifæri gæfust til að byggja upp iðnað þá væntanlega á stór Ísafjarðarsvæðinu. Á það er hinsvegar að líta að iðnaður þarf markað og ef sá markaður er í Evrópu eða Ameríku þá er erfitt að keppa við þá aðila sem sem eiga styttra að sækja á markaðinn. Það þyrfti því að vera eitthvað virkilega sérstakt ef það ætti að vera samkeppnishæft á heimsmarkaði. Vonandi gætu bestu heilar Vestfjarða komið upp með einhverja frumlega hugmynd. 

Annars væri ánægjulegt ef stjórnmálaflokkarnir myndu nú ropa útúr sér hvað þeir hafa hugsað sér að gera í málefnum landsbyggðarinnar ekki eru þeir allavega að flíka því þessa dagana. 

Öfundaðir vegna orkuforðans

Hollingham fer ekki dult með að hann öfundar Íslendinga af forða þeirra af endurnýjanlegum orkugjöfum. Nú er bara að nýta þessa orkugjafa skynsamlega því þeir eru ekki óþrjótandi. 

Fjallað um umhverfis- og stóriðjumál Íslands í BBC og Independent