Að brosa og vera sæt

Það virðast allar kannanir vera sammála um það að fólk sé almennt ánægt með sitt og það hlýtur að þýða að ríkisstjórnin hafi staðið sig þokkalega. Hinsvegar virðist fylgið við ríkisstjórnina endurspegla vilja kjósenda til að breyta til. Ætli það sé ekki bara málið hjá stjórnarandstöðunni að hætta að reyna að tala niður efnahagsárangur ríkisstjórnarinnar. Það er bersýnilega til einskis.  Hinsvegar ættu menn þá að leggja meiri áherslu á að taka góðar portrett myndir og gera skemmtilegar sjónvarpsauglýsingar til að leggja áherslu á að það sé hægt að velja nýtt fólk. Slagorðið gæti hljómað þannig: Nýtt fólk með sömu áherslur eða Sami grauturinn í nýjum potti. Þetta væri mun vænlegra til árangurs að mínu mati.  

Meirihluti segir afkomu sína hafa batnað

Að vera blóraböggull íhaldsins

Það er aldrei gott hlutskipti að vera blóraböggull og það hefur Framsóknarflokkurinn fengið að reyna hin síðari ár. Árið 1995 fékk flokkurinn 23,3%, árið 1999 18,4% og árið 2003 17,7%. Undanfarið hefur flokkurinn síðan verið að mælast með milli 8 og 10% fylgi. Það er því ljóst að flokkurinn er ekki að njóta þeirra verka sem ríkisstjórnin hefur komið í gegn heldur tekur hann á sig allt það neikvæða þess í stað að því er virðist. Egill Helgason kallaði þetta ástand að vera hýsill fyrir tilbera um það að vera í stjórn með Sjálfstæðisflokknum. Alþýðuflokkurinn tapaði á sínum tíma rúmlega 4% og fór úr 15,5% niður í 11,4% í kosningunum 1995. Það verður spennandi í vor að sjá hvort vinstri flokkarnir verða æstir í að koma í stað Framsóknar ef ríkisstjórnin fellur. Efast um að þeir komi betur út úr því heldur en Framsókn hefur gert.

Guðni: Sjálfstæðisflokkurinn virðist stikkfrí í umræðunni

Núna kemur landsfundarbylgjan inn

Við þessu var að búast enda landsfundir beggja flokka í gangi. VG og Framsókn munu ná einhverju til baka í  næstu könnunum en þó held ég að þetta verði staðan á vinstri vængnum að Samfylking trompi VG og verði jafnvel allt að 10% hærri í kosningunum. 26 á móti 16 fyndist mér ekki ólíkleg útkoma. Stór hluti þeirra sem hafa lýst yfir stuðningi við VG munu ekki fá það af sér þegar á hólminn er komið og kjósa þá Samfylkinguna í staðinn. Það er eitt að segja eitthvað í símann en annað þegar komið er á hólminn og kjörseðillinn liggur á borðinu. 

 

Samfylkingin eykur verulega fylgi sitt á kostnað VG

Byssur og útrás

Það er alveg ótrúlegt hvað Bandaríkjamenn eiga erfitt með að sjá tenginguna milli aðgengis að skotvopnum og morðtíðni. Á Íslandi hefði þessi náungi farið í skólann og slegist við nokkra nemendur til að fá útrás fyrir sínar meintu ósigra. Það er aðgengið að skotvopnunum sem gerir það að allt þarf að gera upp með þeirra hjálp sem leiðir að sjálfsögðu til mannfalls. Engar byssur = færri morð. Þetta er ekkert flóknara.

Sendi sjónvarpsstöð pakka á milli árásanna

Ertu nú kominn landsins forni fjandi

Aldrei þótti henni ömmu minni góð tíðindi þegar fréttist af hafís fyrir ströndum. Hún man vel eftir hafísárunum á sjöunda áratugnum og harðindunum sem honum fylgdu. Á mínum uppvaxtarárum var hafísinn meira til skemmtunar en skelfingar enda stoppaði hann venjulega stutt við. Lékum við félagarnir oft þann hættulega, en æsispennandi leik, að hoppa á milli jaka og fórum jafnvel langt út á fjörð. Ekki var það nú til að friða foreldra okkar þegar til okkar sást. Það eru því misjafnar minningarnar sem fólk tengir við hafísinn. 

Hafísinn færist nær landi

Gunni skurðgrafa

Það er með eindæmum hvað Gunnar er duglegur að grafa. Það sést varla til hans og félaga hans nema með skóflu á öxlinni. Endar eflaust með því að þeir verða búnir að grafa sig undir Reykjavík til að búa til bílastæðakjallara fyrir Kópavog. Held að það væri réttast að senda Gunnar út á Löngusker, hann myndi redda nýjum flugvelli í einum grænum hvelli. 

Fyrsta skóflustungan tekin að Norðurturni við Smáralind

Efnahagsstefna ríkisstjórnarinnar

Eitthvað virðist ríkisstjórnin hafa verið að gera rétt á undanförnum árum. Eftir allt vælið um óstjórn og klúður kemur það klárlega í ljós að heimilin í landinu hafa það mun betra en fyrir áratug. Hitt er síðan annað mál að það er mikið verk óunnið því ráðstöfunartekjurnar hafa ekki aukist svona mikið hjá öllum í þjóðfélaginu og það þarf að setja kraft í að styrkja landsbyggðina og auka ráðstöfunartekjur þeirra sem minnst hafa með hækkun persónuafsláttar. 

Ætli VG fari núna að prenta barmmerkin:

AF HVERJU EKKI ZERO HAGVÖXT 

eða

HAGVÖXTUR KEMUR FRÁ HELVÍTI

Kaupmáttur jókst um 56% á áratug

Þingmenn velta hver um annan þverann

Það er greinilegt að kosningabaráttan er komin í fullan gang. Þingmenn NV kjördæmis eiga greinilega fullt í fangi með að komast yfir allt kjördæmið og flýta sér greinilega stundum um of. Það er spurning hvort að Óli Þórðar þurfi að halda forvarnarfund svona rétt fyrir þinglok um það að menn þurfi að keyra varlega jafnvel þó að atkvæðin séu í húfi.

Kristinn H. Gunnarsson lenti í bílveltu

Ýkjur Ómars Ragnarssonar

Í viðtali í Morgunblaðinu í dag fer Ómar Ragnarsson mikinn og þá sérstaklega um stóriðju og framtíðaráform þar um. Ómar segir orðrétt.

 

„Forsætisráðherra hefur lýst því yfir að þrjú

álver gætu risið fyrir 2020. Ef þau verða öll

reist í fullri hagkvæmnisstærð munu þau framleiða

þrjár milljónir tonna af áli og þurfa til þess

sex þúsund megavött – alla virkjanlega orku

landsins. Afraksturinn yrði þrjú þúsund störf

eða 2% af vinnuafli landsmanna. Hlutur þessara

álvera í þjóðarframleiðslunni yrði um 7%.”

 

Hér er Ómar augljóslega að fara með fleipur. Hefur einhver nefnt að á Íslandi verði byggð þrjú álver með eina miljón tonna framleiðslugetu? Full hagkvæmnisstærð á álveri í dag er á milli 300 og 400.000 tonn að því er virðist og álver af stærðinni 1.000.000 tonn hafa til þessa einungis risið í Síberíu og við Persaflóann og ekki hafa heyrst nein áform um byggingu fleiri álvera af þeirri stærð utan möguleika á stækkun í Suður-Afríku. Álver af þessari stærð á Húsavík myndi td. valda verulegri byggðaröskun því að milli 1300 og 1500 manns myndu vinna í slíku álveri og önnur 1500 við störf tengd álverinu og þjónustu við það. Það sér það hver maður í hendi sér að 3000 störf á Húsavíkursvæðinu er langt yfir því sem svæðið þolir og það jafnvel þó að Eyjafjarðarsvæðið sé tekið með í reikninginn.

Eins og sést af þessu þá er útreikningur Ómars á hversu mörg störf þriggja miljóna tonna framleiðsla á áli myndi gefa af sér einnig fremur vafasöm, ef ekki kolröng. Fjarðaál hefur 400 starfsmenn og alls vinna um 900 manns störf tengd álverinu . Miljón tonna álver myndi því skapa yfir 2500 störf og því myndu þrjú álver af þessari stærð skapa yfir 8000 störf eða 4,9% af heildarvinnuafli 2006 (miðað við 8500 störf). Með þessu myndi álframleiðsla tífaldast og skila 630 miljörðum á ári í útflutningstekjur eða 78% útflutningstekna miðað við árið 2006. Hlutfall iðnaðar í vergri landsframleiðslu er nú 11% en myndi væntalega aukast í hlutfalli við tífalda framleiðsluaukningu og einnig myndi þáttur veitustofnana í landsframleiðslunni aukast hlutfallslega. Hversu stór hluti þjóðarframleiðslunnar 3,5 miljónir tonna verður vil ég ekki slá neinu föstu um en þau 55% sem ég fékk út er trúlega of há tala. Það er allavega ljóst að það er langt frá þeim 7%  sem Ómar fær út.

Það er góðra gjalda vert að vera umhugað um náttúruvernd og umhverfið. Hitt er annað þegar slegið er fram óábyrgum tölum sem eiga sér enga stoð í raunveruleikanum til að byggja undir sinn málstað. Ekki er einungis verið að ýkja upp þau álver sem eru í umræðunni heldur er einnig verið að draga úr efnahagslegum áhrifum þeirra. Það er verið að reyna að láta það líta þannig út að verið sé að fórna landinu okkar fyrir ekki neitt. Slíkt er fjarri sanni því það er hvorki verið að fara að framleiða 3,5 miljónir tonna af áli né að slíkar framkvæmdir ef til þeirra kæmu myndu litlu sem engu skila í þjóðarbúið.

Hafa skal það sem sannara reynist 

 

Algert rugl

Til hvers var verið að kjósa um forystu á þessum fundi? Var virkilega búist við að skipt yrði um hesta á miðju vaði? Ekki held ég að nokkrum manni hafi hvort eð er dottið í hug að bjóða sig fram og taka við þrotabúinu svona rétt fyrir gjaldþrot. Það er ljóst að Ingibjörg og Ágúst eru að leggja ferilinn að veði 12 maí og allt undir 25% verður talinn mikill ósigur fyrir Samfylkinguna og kallar væntanlega á breytingar í forystunni.  

Ingibjörg Sólrún og Ágúst Ólafur endurkjörin