Er Helgi Seljan að missa sig?

Eftir að hafa fylgst með umfjöllun Stöðvar 2 og Rúv um ríkisborgararéttar málið virðist þetta liggja nokkuð klárt fyrir. Fram kom að 30% þeirra sem fá ríkisborgararétt gegnum undanþágu frá Alsherjarnefnd hafa búið hérlendis í skemmri tíma en 2 ár sem gerir mál tíðræddrar stúlku að venju fremur en undantekningu. Af því leiðir að þetta mál er allt hið undarlegasta af hendi Rúv og Helga Seljan. Fram er komið með málið sem mikla stórfrétt sem tekur undir sig nærri helming Kastljóss í einræðu Helga Seljan. Ekki reynist síðan nokkur fótur fyrir ásökunum Helga og málatilbúnaður allur með eðlilegum hætti.

Aðeins tvennt getur komið til greina sem ástæða fyrir þessu upphlaupi Helga og Rúv. Ritstjórn Kastljóss hefur hrakað svo að hún er komin niður á stig slúðurblaðanna eða að Helgi sé í persónulegu stríði á hendur Jónínu og/eða Framsóknarflokknum og reyni að smyrja óhróðri á Jónínu og flokkinn tveimur vikum fyrir kosningar. Framkoma Helga í viðtalinu við Jónínu var þess utan með eindæmum ókurteis með endalausum frammíköllum og útúrsnúningum og sást það greinilega að Helgi var orðinn ansi æstur og ekki sáttur við þá stefnu sem málin voru að taka.   

Nú fyndist mér að eðlilegustu málalok væru þau að fram kæmi opinber afsökunarbeiðni frá Rúv og Helga til ráðherrans og fjölskyldu hennar fyrir að bera á þau órökstuddar sakir og myndu þeir vera meiri menn af því að viðurkenna sín mistök.

 

Ríkisborgararétturinn, alsherjarnefnd og Jónína

Það runnu nú á mig tvær grímur þegar ég sá fréttirnar um tengdadóttur Jónínu Bjartmars í dag. Varla færi nokkur viti borin manneskja að vera með puttana í svona málum í miðri kosningabaráttu, það væri hreinlega hybris af versta tagi. Ég kíkti síðan á Kastljósið og sá þar Helga Seljan halda langa einræðu um málið og sýna þarna hálfgerða DV blaðamennsku að því að mér fannst með því að ýja að ýmsu en bakka það lítið upp með vitnisburði eða heimildum. Að sjálfsögðu eiga blaðamenn að benda á það sem þeim finnst vera vafasamt í stjórnsýslunni en þarna var gengið langt í að reyna að láta málið líta eins illa út fyrir ráðherrann og mögulegt var. 

3 meðlimir alsherjarnefndar hafa gefið það út að Jónína hafi ekki haft áhrif á afgreiðslu nefndarinnar og nú mun Jónína koma í Kastljósið í kvöld og skýra sína hlið málsins. Hvort að það sé nóg til þess að sannfæra almenning um að ekkert óhreint sé í pokahorninu er síðan annað mál og réttast væri eflaust að setja hlutlausa nefnd í málið til að fara ofan í saumana á þessu ferli öllu. Hæpið er að birta öll gögnin opinberlega þar sem um viðkvæmar persónuupplýsingar er eflaust að ræða í einhverjum tilfellum. Ef til vill væri umboðsmaður Alþingis rétti aðilinn til að fara ofan í saumana á málinu.

Ef síðan kemur í ljós að ráðherrann hefur haft óeðlileg afskipti af málinu þá er eðlileg krafa að hún segi af sér embætti. Þrátt fyrir að vera Framsóknarmaður þá sé ég ekki aðra kosti í stöðunni fyrir ráðherrann því sem embættismaður ber henni skylda til að hlíta landslögum og venjum. Ef hún hinsvegar er saklaus af þessu þá ætti Helgi Seljan að fá ádrepu frá útvarpsstjóra fyrir fréttaflutning sem ekki sæmir fjölmiðli sem vill láta taka sig alvarlega. Fjórða valdið er jafn vandmeðfarið og hin þrjú. 

Er Strandasýsla hluti Vestfjarða??

Oftar en ekki finnst mér það brenna við að Strandir og íbúar þeirra séu ekki taldar með Vestfjörðum nema á hátíðis og tyllidögum. Síðasta dæmið um þetta er skýrsla Vestfjarðanefndarinnar svokölluðu þar sem ekki fer mikið fyrir Strandasýslu eða byggðum hennar. Alls koma fyrir í skýrslunni 4-6 störf í sýslunni og þau öll á Hólmavík og bent hefur verið á að EKKI eigi að leggja 3 fasa rafmagn um sýsluna. Það sér það hver maður í hendi sér að Hólmavík er ekki eina byggðarlagið í sýslunni þó að það sé stærst og gegni hlutverki þjónustukjarna sýslunnar. Helmingur íbúa sýslunnar býr í þéttbýli þar sem megintekjur koma frá sjávarútvegi, þjónustu og stjórnsýslu. Hinn helmingurinn býr í dreifbýli þar sem landbúnaðurinn er eina eða aðaltekjulindin.

            Hversu oft var minnst á landbúnað í skýrslu Vestfjarðanefndar? Einu sinni og það einungis til að taka það fram hversu mörg störf væru í landbúnaði á Vestfjörðum. Engar tillögur voru um hvað hægt væri að gera til að styrkja þann atvinnuveg. Þessi atvinnuvegur er ásamt sjávarútvegnum mikilvægastur fyrir Strandamenn og því ríður þar mest á að gerð sé gangskör að því að styrkja hann og efla.

            Hvað er þá til ráða í landbúnaðarmálum Strandamanna? Eitt svar gæti verið á þá leið að leggja hann bara niður og flytja fólkið á mölina. En Strandamenn eru stoltir bændur sem hafa lagt sig fram við að rækta upp sitt fé og sést það best á haustin þegar aðrir bændur koma nánast í pílagrímsferðir til að sækja sér gimbrar og hrúta til að kynbæta eigin stofna. Til þessa hefur lítið verið gert til þess að nýta sér þessa sérstöðu Strandamanna sem ræktenda úrvalsfjár. Móðir mín kom reyndar með þá hugmynd að Vestfirðir yrðu eitt sauðfjárræktarsvæði og sláturhúsið á Hólmavík yrði opnað á nýjan leik og myndi einungis slátra lömbum frá Vestfjörðum. Kjötið sem þarna kæmi frá væri síðan hægt að markaðssetja sem vestfirska villibráð á neytendamarkað. Frekari vinnsla á kjötinu gæti síðan skapað atvinnu fyrir hluta starfsmanna sláturhússins árið um kring og með því draga úr þeim sveiflum sem einkenna vinnu sem tengist sláturhúsum. Ég held að neytendur myndu gleypa við hnossgæti eins og lambalundum eða hryggjarvöðvum krydduðum með blóðbergi og fjallagrösum svo tekið sé dæmi. Vistvæn framleiðsla er í sókn á Vesturlöndum og slátrun á úrvals lambakjöti gæti skapað Vestfirðingum og Strandamönnum sérstöðu á markaði og þar með skapað atvinnu fyrir þá sem ekki hafa löngun til að yfirgefa sveitasæluna fyrir streitu borgarlífsins.

 

Höfundur er fæddur og uppalinn á Melum 1 í Árneshrepp

En stundar nú nám við framleiðslutæknifræði í Óðinsvéum

 

Greinin hefur áður birst á vefnum Strandir.is 

Blessuð sé minning hans

Reikna nú með því að ekki verði borið neitt annað fram í erfidrykkjunni en úrvals vodka. Skál!

Jeltsin jarðsettur í dag

Röng ákvörðun

Það þarf að skoða þetta af aðeins meiri skynsemi. Álver eins og Norðurál ætlar að byggja í Helguvík framleiðir umbræðslu með takmarkaðan virðisauka fyrir þjóðfélagið en borgar það sama í rafmagn og álver sem skila frá sér vöru sem er tilbúin í valsverk og fullvinnslu. Þetta er álver af þriðjaheimstýpunni eins og  umhverfisverndarsinnar héldu svo ákaft fram um álverið í Straumsvík og mun ekki gefa Suðurnesjamönnum öll þau tækifæri sem hægt er að fara fram á fyrir orkuna. Það munu koma önnur tækifæri og því ekki rétt að stökkva á þetta eins og úlfur á kjötbein. 

Hitaveita Suðurnesja og Norðurál undirrita orkusamning vegna álvers í Helguvík

Ekki er sopið kálið...

Bifrastarmenn eru fljótir að byrja að telja seðlana. Fyrst þarf nú fólkið að finna störf osv. Það væri kanski réttast að segja það að í góðæri ætti ríkið ekki að tapa á þessari framkvæmd en í kreppu myndi lítill hluti þessa hóps vera í vinnu og því nánast eingöngu kostnaðarliður. Með þessu er ég þó alls ekki að mæla á móti þessari framkvæmd sem er löngu tímabær og mun koma mörgum til góða.

Ríkissjóður gæti hagnast á að afnema tekjutengingu bóta

Misskilningur

Hér er ekki um að ræða nýjan Tröllatunguveg.  Hinn nýji vegur mun ekki liggja í landi Tröllatungu eins og eldri vegur heldur um Arnkötludal og Gautsdal og nefnist því Arnkötludalsvegur hjá heimamönnum.

Samningur um gerð nýs Tröllatunguvegar undirritaður

Skóflustungupólitík!!!

Ingibjörgu Sólrúnu var tíðrætt um skóflustungupólitík stjórnarflokkana í sjónvarpinu í gær. Það mætti halda að hún hafi aldrei opnað nýtt íþróttahús eða tekið skóflustungu á kosningaári þegar hún var borgarstjóri. Er þetta dæmi um málefnaþurrð stjórnarandstöðunnar eða finnst þeim bara skemmtilegra að vera neikvæð og einblína á það að finna galla hjá andstæðingunum en jákvæð og benda á það góða í eigin stefnu?

Sígandi lukka er best

Þar kom að því. Könnun fréttablaðsins sýnir Framsóknarflokkinn skríða yfir 10% markið og ekki mátti það mikið seinna vera. Það virðist vera sem enn og aftur ætli hið fornkveðna að sannast að endaspretturinn sé Framsókn drjúgur. Landsfundarsveiflan á Sjálfstæðisflokki og Samfylkingu er gengin til baka að því er virðist og því jafnræði komið á með flokkunum. Það að minni flokkarnir komi ekki mönnum að eða fái amk ekki yfir 5% þýðir að atkvæði greidd hinum flokkunum öðlast aukið vægi. Hinsvegar finnst mér líklegt að frjálslyndir komi að manni á Vestfjörðum hvað se tautar og raular. Það verður síðan áhugavert að sjá Gallup könnunina fyrir þessa viku sem nú er að byrja og sjá hvort að hún rímar við þessa könnun. 

Obama eða Hillary?

Sá Barack Obama í viðtali hjá David Letterman í dag. Hann virkaði á mig eins og blátt áfram náungi sem getur gert grín af sjálfum sér og tekur sig ekki of alvarlega. Raunsær og skynsamur í tilsvörum og þykist ekki vita of mikið. Virkar á mann þannig að hann sé ekki orðinn spiltur af verunni í Washington enda aðeins búinn að eyða þar 2 árum í öldungadeildinni. Að mínu mati myndi hann bera með sér ferska vinda inn í hvíta húsið sem ekki er vanþörf á eftir 8 ár með trúðinn Gogga W við völd. Ekki væri verra ef að Hillary yrði varaforsetaefni og þar með reynslubanki fyrir Obama. Það að Hillary sjálf yrði forseti væri að ég held ekki það besta þar sem hún hefur jú þegar setið óbeint í 8 ár og er því orðin svolítil kerfiskerling. Annars virðist Guiliani ætla að verða frambjóðandi repúblikana og er það vel því sá maður hefur sýnt það nú þegar að hann getur tekið til hendi. Það er því ljóst að 2009 mun taka við forseti í Bandaríkjunum sem getur valdið starfinu öfugt við þann sem nú situr.