4 ár frá falli Saddams

Í dag eru 4 ár frá því að Bagdad "féll" í hendur Bandaríkjamanna. Allt frá þeim degi hafa tök Bandaríkjamanna á landinu minnkað og jafnvel í suðurhluta landsins hafa átök aukist. Endirinn hlýtur að vera í nánd fyrir hernaðaríhlutun Bandaríkjamanna enda stuðningur við stríðsreksturinn að hverfa heima fyrir og erlendis.

Eina ástæðan fyrir að halda áfram þessum stríðsrekstri hlýtur að vera að gera vinum og kunningjum kleift að maka krókinn á hörmungunum. Ef árangur er það sem Bush er að sækjast eftir væri hægt að ná honum með að leyfa íraska hernum að sjá um dæmið með fjárstyrk og sérfræðiaðstoð. Með því að draga herinn út úr Írak myndi stór hluti uppreisnarmanna leggja vopnin á hilluna og ef að menn eru í stuði til að heyja borgarastríð þá verður bara að leyfa þeim það.

Það er alveg sama hvort Bandaríkjamenn verða í Írak í 5 daga eða í 50 ár, þeir munu aldrei leysa deilumál Shía og Súnnía. Þau mál verða þeir að leysa sjálfir með vopnum eða ekki. Nærtækt dæmi er Júgóslavía sem var haldið í skefjum í 50 ár, en það kom ekki í veg fyrir að menn bærust á banaspjót út af 50 ára gömlum deilum og þaðan af eldri.

Bandaríkjamenn verða að viðurkenna að þeir eru ekki lausn vandans heldur hluti hans.

Athugasemdir

[Jenný Anna Baldursdóttir, 10.4.2007 kl. 17:42]

Gæti ekki verið meira sammála, heyr, heyr, og ég er sammála þér Hafþór Örn líka. 

[Guðmundur Ragnar Björnsson, 10.4.2007 kl. 19:40]

Ég held reyndar að Davíð og Halldór hafi aldrei hugsað málið lengra en út í Keflavík. Afstaða þeirra markast af því að þeir héldu á sínum tíma að hægt væri að halda hernum í Keflavík með því að klóra bakið á Sámi frænda. Þegar okkur var síðan launaður greiðinn með því að stinga af á einni nóttu áttum við að sjálfsögðu að bakka út úr þessu bulli enda þá engin ástæða til að halda þessu áfram.

[Snorri Hansson, 11.4.2007 kl. 01:58]

Ég las nýlega að það liggi fyrir Íraska þinginu að breyta skuli lögum þannig að
“alþjóðleg fyrirtæki” geti unnið olíu á Írösku landsvæði.

[Guðmundur Ragnar Björnsson, 11.4.2007 kl. 07:11]

Íslendingar fóru jú að nafninu til í þetta vegna gereyðingarvopna Íraka sem CIA hafði skáldað upp. Hinsvegar sé ég ekki neina beina hagsmuni fyrir Íslendinga aðra en að styrkja tengslin við USA. Þetta er að mínu mati bara veruleikinn eða Realpolitik. Auðvitað er hægt að kalla þetta ýmsum nöfnum bæði ákvörðunina um að fara inn í Írak og það að draga sig til baka. Ég leyfi mér hinsvegar að efast um að íslenska utanríkisráðuneytið hafi metið Írak sem stórhættulegann óvin sem væri líklegur til að ráðast á Ísland. Núna væri tildæmis hægt að segja að Íslendingar séu ósammála því hvernig stríðið er rekið í Írak og draga stuðninginn til baka en þar sem UN eru hinsvegar komnar í spilið er hægt að halda áfram stuðningi við uppbyggingu í gegnum UN í staðinn. Það að Íslendingar sé eitthvað meiri hræsnarar en aðrir þá efast ég um það. Utanríkispólitík snýst um hagsmuni ríkja fyrst og fremst en ekki það sem er rétt og satt og mun gera það áfram.