Hafnfirðingar sáu í gegnum "blöff" Alcan

...en var Alcan kanski ekki að blöffa??? 

Hafnfirðingar höfnuðu deiliskipulaginu sem gerði ráð fyrir stækkun Alcan í gærkvöldi með 88 atkvæðum. Nú er spurningin hvort að 50,06% Hafnfirðinga sem mættu á kjörstað hafi verið klókir pókerspilarar og lesið sín spil rétt eða hvort að þeir hafi spilað rassinn úr buxunum. Spá Seðlabanka Íslands sem mikið var talað um í vikunni gerði ráð fyrir talsverðu atvinnuleysi á næstu árum eða allt að 5000 manns. Spurningin er hversu auðvelt verður fyrir starfsmenn Alcan að fá nýja vinnu þegar að því kemur að loka fyrirtækinu eins og nú virðist blasa við. Ég er hræddur um að Hafnarfjörður verði klofinn lengi ekki síst ef til þess kemur að yfir 200 Hafnfirðingar verði atvinnulausir vegna atkvæða nágranna sinna. Slíkt ástand í bænum yrði skelfilegt. Nú reynir á hvort að starfsmenn Hagfræðistofnunar hafi eitthvað fyrir sér í því að störf skapist fyrir þetta fólk svo ekki þurfi til þessa að koma. 

Athugasemdir

[Hafþór Örn Sigurðsson (IP-tala skráð) 1.4.2007 kl. 09:53]

Störf koma og fara, fyrirtæki koma og fara.  Enginn heimsendir þó Alcan færi úr straumsvík.  Hversvegna er annars verið að gera ráð fyrir að fyrirtækið sé að fara á næstu árum?  Er framleiðslan virkilega svo óhagkvæm að ekki borgar sig að framleiða ál í Straumsvík?

Ég veit ekki hvað það er, en mér finnst eins og margir haldi að Hafnafjörður sé þar sem hann er vegna álversins, ekki öfugt. 

Og annað, ekki héldu menn að álverið væri komið til að vera í Hafnarfirði?  Mér finnst menn oft setja þetta þannig upp að ef stækkun hefði verið samþykt þá hefði álverið og Kapelluhraunið runnið saman í eina eilífa heild.. hehe.

Kveðja.

[Einn ekki úr Hafnarfirðinum (IP-tala skráð) 1.4.2007 kl. 10:58]

Fróðir menn segja að fyrirtækinu verði aldrei lokað vegna útsöluverði okkar á raforkunni.  Þeir geta víst aukið afköstin með því að skipta út kerjum en sá möguleiki er óhagkvæmari en stækkun álversins sjálfs.  Af hverju skildu Alcan´s menn hafa setið á þessum upplýsingum ?????????? 

[Guðmundur Ragnar Björnsson, 1.4.2007 kl. 13:39]

Nú eru margir búnir að gera sig að sérfræðingum í rekstri álvera en málið er í raun einfalt. Í dag er verð á áli á heimsmarkaði um 2800 dollarar per tonn og þar sem framleiðslukostnaður við tonn á áli í Straumsvík liggur einhversstaðar á milli 1300 og 1600 dollara per tonn þá gefur það auga leið að hagnaðurinn er fínn. Árið 2002 og 2003 til dæmis var síðan álverð í kringum 1500 til 1600 dollara per tonn og  þá liggur það í augum uppi að hagnaðurinn er takmarkaður ef nokkur. Spár sérfræðinga gera ráð fyrir að álverð muni lækka og árið 2012 verði það komið niður í 1450 dollara per tonn og þar sem aðeins tvö ár eru þá eftir af raforkusamning Alcan þá veltur það auðvitað á tveimur þáttum hvort starfseminni verður haldið áfram eftir það. Verður raforkuverðið samkeppnishæft og hverjar eru framtíðarhorfur á álmarkaði.

Nú er verið að reisa álver út um allan heim sem eru stærri og með betri tækni en Alcan í Straumsvík sem gerir það að verkum að þau eru með framleiðslukostnað á milli 1000 og 1200 dollara per framleitt tonn og standa því mun betur að vígi en Alcan í Straumsvík þegar álverð lækkar. Þannig standa einfaldlega málin.

Einn ekki úr Hafnarfirðinum

Það er misskilningur að raforkuverðið skipti öllu máli fyrir álver. Auðvitað er það gríðarstór þáttur (um 25%) en fer samt sem áður minnkandi með betri tækni. Launakostnaður og annar hráefniskostnaður eru stórir þættir. Það að skipta út kerjum í núverandi kerskálum er ekki raunhæfur kostur. Ný ker eru nærri helmingi stærri en þau gömlu og eina leiðin væri sú að rífa einn kerskála í einu og byggja upp á nýtt. Slíkt þýðir hinsvegar framleiðslutap og gríðarlegann kostnað sem er vafasamt að leggja út í ef ávinningurinn verður sá að eftir stendur einungis 250.000 tonna álver. Það er að mörgu að hyggja í þessu samhengi.   

[Hafþór Örn (IP-tala skráð) 1.4.2007 kl. 14:29]

Áhugavert Gummi.

En er þetta ekki bara frekar einfalt í raun.  Ef Hafnfirðingar vilja ekki stærra álver, og ef Alcan treystir sér ekki til að reka þetta álver með hagnaði í þessari stærð þá verður að loka?  Þetta hljómar allavega mjög einfalt.

En við tæknikarlarnir þurfum nú ekkert að hengja haus yfir þessari höfnun.  Það má vel athuga aftur stækkun eftir 4-8 ár og þá geta forsendur verið allt aðrar.  Kannski rekur atvinnuleysi okkur út í stækkun, kannski rekur mikil olíukreppa okkur út í að loka því hreinlega og nýta orkuna í annað...

Hafnarfjörður hvorki stendur né fellur á því hvort álver sé þarna á bæjarmörkunum.   Ég veit tildæmis ekki til þess að það sé nokkuð álver í Danmörku, ekki kvarta þeir..hehe.

[Lárus Vilhjálmsson, 1.4.2007 kl. 18:53]

Guðmundur, það má alveg hætta hræðsluáróðrinum um að álverið loki. Bæjarbúar í Hanfarfirði eru búnir að taka ákvörðun þrátt fyrir þessa hótun. Ég átti tal við einn starfsmann ALCAN í dag og hann viðurkenndi að álverið myndi loka í fyrsta lagi eftir 15 ár. Og veistu hvað, mér finnst það bara allt í lagi.

[Guðmundur Ragnar Björnsson, 1.4.2007 kl. 19:39]

Sæll Lárus

Þetta er hvorki hræðsluáróður eða hótun og hefur aldrei verið. Þetta eru kaldar og harðar staðreyndir eins og ég rek hér að ofan. Það getur vel verið að þú viljir álverið í burtu en eins og þú sást eru aðeins 6381 Hafnfirðingar sammála þér á meðan 10266 eru annaðhvort ósammála eða er alveg sama. Mér finnst það líka að kasta steinum úr glerhúsi að kalla þetta hræðsluáróður. Hefur málflutningur Sólar í Straumi verið eitthvað annað en hræðsluáróður? Svo að ég taki dæmi: Börnin kafna úr mengun, fasteignaverð mun hrynja, óðaverðbólga, Þjórsárdal sökkt, Hafnarfjörður drukknar í svifryki frá álverinu. Ég hef allavega mun meira fyrir mér í mínu mati á líftíma fyrirtækisins en Sól í Straumi með fyrrnefndar fullyrðingar.