Við viljum jafnrétti - Sótt að síðasta vígi karlmanna

Í ljósi líflegrar umræðu um jafnrétti að undanförnu og ekki síst hér í bloggheimum ákvað ég að gera smá naflaskoðun. Nú hleypur hér hver kvenréttindakonan af annarri upp til handa og fóta og fordæmir launaleynd og misvægi á hlutfalli karla og kvenna í stjórnum fyrirtækja. Við karlpungarnir nötrum og skjálfum og þorum varla að svara fyrir okkur enda við að verða vel húsvandir. Síðasta vígi karla er því að falli komið enda harðar sótt að því en Hornborg og eigi jafn hugaðir menn á borgarmúrnum. 

Á mínu heimili hefur því þannig farið að lengst af hef ég haft hærri tekjur en eiginkonan. Þegar hinsvegar kemur að þeim hluta að ráðstafa tekjunum þá reiknast mér svo til að eiginkonan ráðstafi nánast öllum þeim tekjum sem ekki fara í þessa föstu venjulegu hluti eins og húsnæði og rekstur bifreiðar. Það er hún sem ákveður hvað er keypt á börnin, hvað fólki er gefið í afmælis og jólagjafir, hvað er í matinn osv. Hverju ráðum við karlmenn á heimavígstöðvunum þessa dagana? Hvort að við vöskum upp fyrir eða eftir fréttirnar?

Svo ég haldi nú áfram að barma mér þá er ég hættur að reyna að finna föt á krakkana á morgnana því það er tóm tímaeyðsla. Það eina sem ég hef uppúr því er hneykslunarblik og taut ,,að þér skyldi detta það í hug að setja barnið í þetta. Það vita það allir að bleikt og appelsínugult fer ekki saman. Drengurinn lítur út eins og ég veit ekki hvað".

Ekki tekur skárra við þegar kemur að auglýsingatímum sjónvarpsstöðvanna. 90% auglýsinganna er beint að konum og þau 10% sem eftir eru er beint að samkynhneigðum og/eða einhleypum körlum. Það þarf ekki að taka það fram að manni dauðleiðist að horfa á endalausar kremaauglýsingar þegar maður myndi heldur vilja horfa á bíla eða verkfæraauglýsingar.  

Sá skondna tilvitun í bílasala um daginn þar sem þeir sögðu að karlarnir kæmu stundum nokkrir saman og skoðuðu bíla. Spáðu þeir mikið í tæknileg atriði eins og hestöfl, tork og aukahluti. Oft væru það bílar eins og hér að neðan sem væru skoðaðir.

 

 

Hinsvegar þegar konan mætir á svæðið er annað uppá teningnum. Notagildi, litur á mælaborði og annað verður oftast til þess að á endanum verður bíll eins og að neðan fyrir valinu.

 

Finnst konum síðan virkilega skrýtið að við karlagreyjin viljum halda í síðasta vígið þeas að afla meira. Hvað eigum við eftir þegar þetta vígi er fallið? Leyfið okkur að halda í þá tálsýn að við fáum hærri laun. Skiptir það einhverju máli þegar það er hvort eð er kona sem að eyðir þeim.

 

Athugasemdir

[Fanney Magnúsdottir (IP-tala skráð) 28.3.2007 kl. 10:43]

Guðmundur minn úr hvaða sveit ert þú eiginlega?? það vita allir að appelsínugult og bleikt passar ekki saman!!

Ég veit ekki með hvernig þetta er á þínum bæ, en á mínum bæ veit ég alla vegna hvað maðurinn eyðir í veiðiferðir, slatti í poka hvert ár. Og við þær konur vil ég segja sem fussa yfir því í hvaða föt maðurinn setur börnin í, bítið bara á jaxlinn og þegið, eyðið orkunni í eitthvað annað en þessaa fáránlegu fullkomnunaráráttu sem hrjáir margar okkar, það verður allt miklu auðveldara þegar við náum að slaka á gaghvart einhverju jafn þýðingarliltlu eins og að börnin okkar séu í samstæðum sokkum. Segið bara þegar þið mætið með barnið í skólann "ææ klæddi pabbi þig í vitlausa sokka og of litlar buxur, dæsa svo og málið er leyst" enginn heldur þá að þú sért ekki hin fullkomna móðir.

En Guðmundur minn það er allger misskilningur að typpið á ykkur körlunum verði eitthvað stærra þótt launin séu hærri, þannig að það skiptir engu máli þótt það vígi falli:-)....

kveðja þín vinkona og feministinn Fanney

[Guðmundur Ragnar Björnsson, 28.3.2007 kl. 18:11]

Sæl Fanney

Ef það væri svo gott að typpið stækkaði með hærri launum

Annars er ég hjartanlega sammála þér með fullkomnunaráráttuna, hún er erfið viðureignar.