Í dýragarðinum á stóra bænadegi

Skelltum okkur í dýragarðinn í dag á stóra bænadegi (store bededag). Heyrði því víst fleygt að hann hefði á sínum tíma heitið Kóngsbænadagur á Íslandi en verið lagður niður þegar leiðir skildu með Dönum. Hér var dýrðarveður með um tuttugu stiga hita og logni sem er alveg passlegt fyrir fólk eins og mig sem er alið upp á ströndum Norður-Íshafsins. Ekki spillti það fyrir að skollans vespurnar eru ekki komar á kreik í stórum stíl þannig að ég fékk aldrei þessu vant að éta dönsku ísvöffluna mína í friði með þeyttum sykruðum eggjahvítum og sultu. Hef annars venjulega átt í harðri varnarbaráttu við hinar sykursjúku vespur á góðviðrisdögum í dýragarði Odenseborgar.

Krakkarnir skemmtu sér hið besta við að fylgjast með sæljónunum leika listir sínar og ekki spillti fyrir að tapírarnir og ljónin hafa fjölgað sér í vetur því fátt er skemmtilegra en að sjá nýja unga. Síðan var klykkt út með því að kíkja á dverggeiturnar og klappa þeim í bak og fyrir. Það verða trúlega svona vordagar sem maður á eftir að sakna mest þegar komið verður á klakann á ný.

Athugasemdir

[Guðmundur Bjarnason (IP-tala skráð) 4.5.2007 kl. 19:41]

Iss, það er alltaf hægt að fara í Húsdýragarðinn í -5°C frosti og roki. Eða þá bara fara norður á Strandir.  Þú átt ekkert eftir að sakna hitans og notalegheitanna, ekki meðan þú hefur þetta.

[fanney (IP-tala skráð) 5.5.2007 kl. 05:56]

Slurp...fékk vatn í munninn við lýsinguna á ísvöfflunni....jahá mar á sko eftir að sakna veðursins...kveðja frá öllum í Kalmar