Ríkisborgararétturinn, alsherjarnefnd og Jónína

Það runnu nú á mig tvær grímur þegar ég sá fréttirnar um tengdadóttur Jónínu Bjartmars í dag. Varla færi nokkur viti borin manneskja að vera með puttana í svona málum í miðri kosningabaráttu, það væri hreinlega hybris af versta tagi. Ég kíkti síðan á Kastljósið og sá þar Helga Seljan halda langa einræðu um málið og sýna þarna hálfgerða DV blaðamennsku að því að mér fannst með því að ýja að ýmsu en bakka það lítið upp með vitnisburði eða heimildum. Að sjálfsögðu eiga blaðamenn að benda á það sem þeim finnst vera vafasamt í stjórnsýslunni en þarna var gengið langt í að reyna að láta málið líta eins illa út fyrir ráðherrann og mögulegt var. 

3 meðlimir alsherjarnefndar hafa gefið það út að Jónína hafi ekki haft áhrif á afgreiðslu nefndarinnar og nú mun Jónína koma í Kastljósið í kvöld og skýra sína hlið málsins. Hvort að það sé nóg til þess að sannfæra almenning um að ekkert óhreint sé í pokahorninu er síðan annað mál og réttast væri eflaust að setja hlutlausa nefnd í málið til að fara ofan í saumana á þessu ferli öllu. Hæpið er að birta öll gögnin opinberlega þar sem um viðkvæmar persónuupplýsingar er eflaust að ræða í einhverjum tilfellum. Ef til vill væri umboðsmaður Alþingis rétti aðilinn til að fara ofan í saumana á málinu.

Ef síðan kemur í ljós að ráðherrann hefur haft óeðlileg afskipti af málinu þá er eðlileg krafa að hún segi af sér embætti. Þrátt fyrir að vera Framsóknarmaður þá sé ég ekki aðra kosti í stöðunni fyrir ráðherrann því sem embættismaður ber henni skylda til að hlíta landslögum og venjum. Ef hún hinsvegar er saklaus af þessu þá ætti Helgi Seljan að fá ádrepu frá útvarpsstjóra fyrir fréttaflutning sem ekki sæmir fjölmiðli sem vill láta taka sig alvarlega. Fjórða valdið er jafn vandmeðfarið og hin þrjú. 

Athugasemdir

[torfi (IP-tala skráð) 27.4.2007 kl. 20:58]

aðeins einn maður hefur fengið hefur fengið ríkisborgararétt svona snemma sem er bobby fisher og mér fannst það hlægilegt að púkka uppá hann útbrunninn skákmann sem hefur aldrei sýnt þakklæti opinberlega.  Duranona, roland,garcia og alexsander petterson fengu ríkisborgarétt eftir stuttan tíma en það eftir a.m.k. tvö ár.  Það sem gerir þetta mál öðruvísi er að í áðurnefndum málum hagnaðist enginn(nema íslendska landsliðið) en jónína hagnast hinsvegar á þessu. 

[Kristján Pétursson, 27.4.2007 kl. 21:18]

Ég vil benda þér Guðmundur á lög um Útlendingastofnun,sem ákveður um stöðu útlendinga,sem hingað koma.Allsherjarnefnd gefur undanþágur frá lögunum,án þess að gera lögformlega grein fyrir sínum ákvörðunum.Ég tel að dómsmálaráðhr.eigi á hverjum tíma að fara með þessi mál,enda æðsti yfirmaður Útlendingastofnunar.Staða Jónínu í þessu máli er mjög dapurleg og ótrúverð,hún ráðlagði stúlkunni,sem hér um ræðir að senda umsókn til Allsherjarnefndar.Ég held að sannleikurinn sé ávallt besta leiðin.

[Gestur Guðjónsson, 27.4.2007 kl. 22:12]

Kristján. Ertu að halda því fram að hér sé hallað réttu máli, að hún hafi ekki sagt satt?