Lokar Alcan ef stækkunin verður felld?

Nú hafa margir tjáð sig um það að sú fullyrðing Alcan um að fyrirtækið hætti starfsemi sinni ef ekki verður stækkað eigi ekki við rök að styðjast. Fram hefur komið að núverandi raforkusamningur er til 7 ára og eftir það er möguleiki á að endursamið verði til 7 í viðbót. Móðurfyrirtækið Alcan Inc. stendur frammi fyrir eftirfarandi möguleikum ef stækkunin verður ekki samþykkt.

1. Að keyra núverandi starfsemi áfram í 7 ár og selja þá starfsemina eða loka verksmiðjunni.
2. Að keyra starfsemina áfram með dvínandi hagnaði í 7 ár og síðan áfram þar til fer að styttast í tap og loka þá.

Rekstrarkostnaður á álveri sem rekið er með 40 ára gamalli tækni er hár og ekki fer hann lækkandi. Segjum nú að Alcan fái tilboð um að byggja álver í Suður Afríku með nýjasta útbúnaði og raforku á sambærilegum kjörum og fást hér. Slíkt álver myndi etv. skila tvöföldum þeim hagnaði sem álverið á Íslandi gæti skilað og hversu lengi myndi stofnfjárfestingin vera að skila sér þá?

Fyrir hinn almenna borgara væri hægt að líkja þessu við að þú værir að greiða í lífeyrissjóð A. Hann skilar ágætis ávöxtun ca. 10% á ári. Nú færð þú tilboð frá lífeyrissjóð B sem býður 20% ávöxtun á ári. Þú hugsar málið þannig að það muni kosta þig hluta af þínum áunnu réttindum að flytja þig um set. Hinsvegar þegar þú horfir til langs tíma muntu græða á því að skipta um sjóð þrátt fyrir fórnarkostnaðinn sem þú lagðir út í byrjun.

Alcan hefur eflaust tugi viðskipta og hagfræðinga á sínum snærum sem fylgjast með þróun mála á heimsmarkaðinum. Ef þeir sjá færi á því að nýta fjármagn fyrirtækisins betur má búast við því að þeir geri það. Finnist fyrirtækinu að það því séu settar skorður við að ávaxta sitt pund kemur það með inn í reikninginn. Íslenskir fjárfestar í dag flytja fjármagn sitt hiklaust þangað þar sem það gefur hæsta ávöxtun og það má fastlega búast við því að Alcan geri slíkt hið sama. Hvað þeir síðan gera þegar þeir vilja losna við Ísal er spurning. Kemur einhver rússneskur fjárfestir sem er alveg sama hvernig staðið er að mengunarvörnum, umhverfismálum og öryggismálum og rekur fyrirtækið áfram í 10 til 20 ár með niðurníddum búnaði rétt undir hollustuverndarmörkum? Það verður fyrst þá sem Hafnfirðingar átta sig á hvað þeir hafa misst og hvað þeir hafa fengið í staðinn. 

Athugasemdir

[Lárus Vilhjálmsson, 16.3.2007 kl. 16:51]

Guðmundur, þvílík endemis vitleysa er þetta. ALCAN ekki að reka álver með 40 ára gamalli tækni. Aðeins um 40% verksmiðjunnar er frá upphafsárunum, 20% var síðan bætt við síðar og 40% verksmiðjunnar er aðeins 10 ára gamall. Ástæðan fyrir því að ALCAN vill stækka er ekki sú að verksmiðjan sé úrelt, heldur nákvæmlega sú sama og hjá öllum fyrirtækjum. Þeir vilja græða meira. Orkuverð á botnprís er gulrót sem er erfitt að hafna.  

[Guðmundur Ragnar Björnsson, 16.3.2007 kl. 17:28]

Á hvaða plánetu býrð þú Lárus minn? Grunntæknin sem notuð er í álverinu er 40 ára gömul. Ef þú reyndir nú að kynna þér málið og kanski að taka boði Alcan um að fara í skoðunarferð um kerskálana myndir þú hugsanlega veita því athygli að kerin í öllum þrem kerskálum eru nákvæmlega eins, bæði þau sem eru í þeim hluta sem er 40 ára gamall og í þeim hluta sem er 10 ára gamall. Kerskáli eitt og tvö voru útbúnir á nákvæmlega sama hátt á sínum tíma og sú ákvörðun var tekin þegar stækkað var síðast að hafa skála 3 með sama sniði því ellegar þyrfti að byggja nýja kersmiðju og skautsmiðju sem hefði ekki verið hagkvæmt fyrir svona litla stækkun. Eina breytingin var sú að settir voru öflugri straumleiðarar svo að hægt var að hækka straum á skála 3. Það er ástæðan fyrir því að hann framleiðir örlítið meira en hinir.

Þú hefur síðan greinilega ekki lesið greinina heldur skellt þér beint í að kalla þetta vitleysu. Það sem ég segi í greininni er nákvæmlega það sem er að Alcan reynir að hámarka hagnað samsteypunnar af fjárfestingum sínum. Þeim er nákvæmlega sama hvort það er hér eða annarsstaðar og því er allt eins líklegt að þeir loki sjoppunni fljótlega ef ekki verður samþykkt og byggi annarsstaðar. Að lokum þá er orkuverð á Íslandi til stóriðju ekki það lægsta sem gerist. Það er þó trúlega það lægsta miðað við lönd á svipuðu velferðarstigi því hér er umframorka til staðar. Ísland er því hagstæður kostur fyrir stóriðju en hefur þó enga sérstöðu á því sviði.

[Rauða Ljónið, 16.3.2007 kl. 18:56]

Sæll, Guðmundur of á tíðum er vonlaust að tala við fól í sértrúarsöfnuðum það tekur ekki röku né vill það heyar sannleikan í málun ein þessara manna er Lárus Vilhjálmsson, VG og sólarmenn hafa hingað til neitað að taka rökum þeir hafa ekki greint rétt frá staðreyndum um neinn þátt í stækkunar málinu  það eina sem kom skýrt fram á fundi í Kænuni og í við tali nokkrum dögum síðar við Pétur Óskarsson var að hann vill flytja alla iðnaðarstarfsemi í Hellnahrauni og Kapelluhrauni burt það virðist vera næst á dagskrá þessara manna.

Kv, Sigurjón Vigfússon

[Lárus Vilhjálmsson, 17.3.2007 kl. 18:14]

Blessaður Guðmundur, Ég bý nú plánetunni jörð ef þú endilega vilt vita það. Þótt að kerin sem notuð eru í dag séu sömu stærðar og þau voru fyrir 40 árum þá hefur öll tæknin sem notuð er í álverinu verið endurnýjuð og er í dag "state of the art" Enda segir fyrirtækið sjálft "Hátæknilegur og flókinn búnaður stýrir öllu framleiðsluferli álversins. Álverið er þannig  hátæknifyrirtæki " Einmitt vegna þessa hefur ALCAN hámarkað framlegð verksmiðjunnar undanfarin ár úr 165,000 tonnum árið 1997 í um 180,000 tonn með því að nýta nýjustu tækni án þess að bæta við kerjum. Og er ekki arður ALCAN per framleitt tonn af áli einna hæstur hér á landi af verksmiðjum þeirra?

Og og til þín Grjóni minn. Þú manst kannski eftir mér en ég bjó á Hverfisgötunni þegar þú bjóst á Austurgötunni. Það er nú ekki fallegt að kalla samgaflara þína fól þó að þu sért ósammála þeim.        

[Guðmundur Ragnar Björnsson, 18.3.2007 kl. 10:35]

Sæll Lárus.

Þú hefur greinilega misskilið þetta eins og margir. Það sem ég sagði var að grunntæknin er 40 ára gömul. Til að einfalda málið væri kanski best að líkja þessu við það að þú keyptir þér bíl án aukahluta. Þú getur dúllað þér við hann og sett á hann aukahluti, tjúnað upp vélina og hvaðeina en bíllinn verður alltaf jafn gamall fyrir því og það kemur að þeim þröskuldi að þú getur ekki tjúnað hann meira því hann hreinlega þolir ekki meira. Stjórnbúnaður og ýmislegt í kringum kerin er mjög hátæknivætt en þú þarft ekki að fara lengra en uppá Grundartanga til að finna ker sem þola tvöfalt meiri straum og framleiða þar af leiðandi mun meira per einingu og það hlutfallslega meira þó að þau séu stærri. Kertæknin verður einungis endurbætt með nýrri tegnund af kerjum og ekki er hægt að skipta kerjunum út einu af öðru því þau eru raðtengd og keyrir hver skáli á sama straum og spennu.

Hvað varðar arð per framleitt tonn þá er hann ekki hæstur á Íslandi, svo mikið veit ég. Alma álverið í Kanada er útbúið með nýjustu kertækni og getur því framleitt ál mun ódýrar en Álverið í Straumsvík og það þrátt fyrir að borga trúlega hærra verð fyrir rafmagnið. Þú sérð því Lárus að Alcan er bundið í hvorugan skóinn hér á landi og tapar litlu sem engu við að byggja nýja verksmiðju annarsstaðar sem gæti framleitt álið ódýrar en gert er hér. Stækkunin myndi hinsvegar tryggja að hér væri hægt að framleiða ál á samkeppnishæfann máta í 20-30 ár.