Hollinn skollinn við Austurvöll

Það getur verið alveg ferlega fyndið en samt sorglegt að fylgjast með blessuðum þingmönnunum okkar þegar styttast fer í kosningar. Troðandi hver öðrum um tær til að komast í viðtal hjá sjónvarps og útvarpsstöðvunum og reynandi hver um annan þverann að finna einhverja góða frasa til skjóta á andstæðingana. Umræðan einkennnist æ minna af málefnunum heldur fremur af því að menn reyna að vera fyndnir á kostnað andstæðinganna og keppast við að hafa hærra og bjóða betur en nágranninn. 

Eru Íslendingar virkilega orðnir svona yfirborðskenndir að hægt sé að vinna kosningar á innistæðulausum slagorðum bara ef þau eru endurtekin nógu oft? Hér í Danaveldi vann Venstre og stjórnarflokkarnir sigur fyrir tveimur árum þar sem danski forsætisráðherrann Anders Fogh Rasmussen keyrði á einu orði alla kosningabaráttunni, skattestop. Þetta orð barði hann inní þjóðina án afláts og þessu trúðu allir fyrir rest sem þýddi fína kosningu fyrir Venstre.

Því miður finnst mér að stjórnmálabaráttan á Íslandi sé að færast í sömu átt. Fínt ef flokkur finnur sér höfuðbaráttumál en það verður að vera meira kjöt á beinunum. Kjósendur eiga rétt á að vita hver stefna einstakra flokka er í öllum helstu málum og í guðanna bænum ekki meira af orðalaginum ,,stefna að". Frekar ættu menn að koma með fastmótaðar tillögur og fjárhagsáætlun til að sýna fram á hvernig fjármagna eigi framkvæmdina eða standa að henni. Aðeins þannig geta menn á trúverðugan hátt komið fram með sín baráttumál. 

Athugasemdir

[Tómas Þóroddsson, 15.3.2007 kl. 21:44]

En þetta er líka leti hjá kjósendum, þeir nenna ekki að pæla í stefnum flokkana og grípa bara eitthvað einfalt eins og "Umhverfisvernd" og hanga á því.

[Ragnar Bjarnason, 16.3.2007 kl. 00:41]

Það var nú samt orðið frekar pirrandi fannst mér í dag þegar umræðuefni þingsins átti að vera sauðfjársamningurinn en eftir því sem leið á umræðurnar var þetta bara orðið klárar kosningaræður.

Held samt að Sigurjón Þórðar hafi verið verstur.