Kosningaútspil sjálfstæðismanna í NV kjördæmi

Það er með eindæmum að fylgjast með framgöngu sjálfstæðismanna og þá sérstaklega Sturlu Böðvarssonar í aðdraganda þessara kosninga. Strandamenn og íbúar við Ísafjarðardjúp hafa árum saman beðið eftir aðgerðum í samgöngumálum og þá sérstaklega eftir því að hafnar verði í framkvæmdir við Arnkötludalsheiði. Eftir að hafa dregið lappirnar í málinu allt kjörtímabilið og frestað framkvæmdum ítrekað, meðal annars vegna aðgerða til að draga úr hinni gríðarlegu þenslu á Vestfjarðakjálkanum, er eins og venjulega hlaupið til þremur mánuðum fyrir kosningar og öllu fögru lofað og loftkastalar byggðir. Arnkötludalur er settur á vegaáætlun og á að verða umferðarhæfur næsta haust. Með því eiga öll bláu atkvæðin á vestfjörðum að vera trygg og til að tryggja sér atkvæðin af Vesturlandi eru fundnir gúmmímiljarðar til að setja í tvöföldun Vesturlandsvegar og Kjalvegur settur á koppinn. 

Hvað gengur eiginlega á? Er samgönguráðuneytið orðin stofnun þar sem ekkert er ákveðið nema á fjögurra ára fresti? Það er auðvelt að gera langtímaáætlanir án ábyrgðar því það eru að koma kosningar. Þetta verða fín slagorð fyrir Sturlu og sjálfstæðismenn á Vesturlandi þegar þeir fara á yfirreið um kjördæmið, ,,sjáið hvað við ætlum að gera". Vonandi þora einhverjir að spyrja hvað þeir hafi þá eiginlega verið að gera síðustu fjögur ja eða átta ár. Þessi loforð eru einskis virði því ekki munu þessir háu herrar muna eftir þeim fyrr en að fjórum árum liðnum.